^^^^^^^^^^^^^^^^^^^^^
*आया किरिया* (हल्बी लघुकथा)
~~~•~~~~~~
!
नाव सोनामती बलले सोनामती चे आय,सोन महा(असन) जेचो मती(बिचार)आसे,रोजे दिने चो असन भात खादली आरू पेज तुमा ने धरून सोनामती हरिक मने सवकार चो बेड़ा ने भूति जायसे,बेड़ा ने अमरे बले नाजुन,आरू सवकार ताना मारते चिचयाय से – दखानु कसन लहर लहर अयसे गांव चो सुंदरी छकमको सवकार चो बेटी,इतरो झटके कसन इलीस सोनामती,खिंडीक बेर ले बले तो एतीस| सोनामती चो चेहरा सर ने उतरली, बामन चो मूसा खादलो बराबर चींव नी करे | मने मने खूबे कंदरली से- हे महाप्रभु बेर येबे उदेसे आरू मय बेड़ा बूता ने अमरलेंसे अउर एदांय फेर कितरो संजकारी एउआंय ये पटिंतर चो गोठ ने तो सवसांझे उफड़ा मरना अयदे ये काय हाल चो जीवना होली बूता करते करते बेरा ने इलो ने बले बारा ठान कहनी| मांतर काय करे सोनामती भूति ले मिरलो पैसा ले घरे बुबा काजे ओखी दवई घेनून नेतोर आसे, संगे संगे पड़तो भाई बहिन मन काजे चाउर-कनकी संगे संगे कागत पतर बले हाट दिन आनून देतोर आय| काय करे ओगाय होली आरू बूता ने भीड़ून गेली | मने बिचार बांदते बांदते कि- ये मसेया सवकार लगे बूता करून करून मय मोचो भाई बहिन मनके आया किरिया खुबे पड़ायेंदे,ये जीवना ने मोचो भाई बहिन केबय नी फंसोत,मय असन बेरा केबय बले एउक नी दयें|
संगे संगे जमाय भूति ने रलो लोग मन के बले सोनामती बलेसे आमी जमाय आपलो घरो जमाय भाई बहिन पीला के पड़ई ने हुसियार बनउं तेबे दिनेक बले डोकरा डोकरी बेरा अस्तिर ने जीवां| नाहले सवकार चो ठेचरना ने बेरा ले लेते मरून जावां,काकय कोनी नी सांगत मान्तर जमाय भूति ने कमातोर लोग मने मने ‘आया किरिया सते गोठ आय’,आमी तो ये गोठ के मोडरी बांदून सगउ रहूंदे|
भूति ने कमातोर लोक चो बूता होयसे,सवकार चो टोंड डंडिक नी थहरे,काइं ना काइं काकय ना काकय बलते रहेसे,भूति लोक भूति करसत दिन कटेसे…
*आया किरिया*
*एंदाय बिचार दसना उठाय से*
*कुकड़ा बासली उजर होउक जायसे*
*मने-मने शीत परायसे*
*मने-मने बाड़ेसे घाम |*
*जेबे जेबे अत्याचार उपरापेला*
*आया किरिया तेबे तेबे होयसे बिहान ||*
•
!✍ © ®
*विश्वनाथ देनांगन,मुस्कुराता बस्तर*
कोंडागांव बस्तर छत्तीसगढ़
मोबाइल : 79995667555
(यदि आपको इस कहानी से प्रेरणा मिली है या आप अपने किसी अनुभव को हमारे साथ बांटना चाहते हो तो हमें satyadarshanlive@gmail.com लिखे,
या Facebook पर satyadarshanlive.com पर संपर्क करे। आप हमें किसी भी प्रेरणात्मक ख़बर का वीडियो भी भेज सकते है)
