सावन मतावय हा मतावत हे…अर्नब चटर्जी के संगीत हा भावत हे…चम्पेश्वर गोस्वामी

अर्नब चटर्जी संगीत के दुनिया के अइसे नाव हे, जेन छत्तीसगढ़ के बिलासपुर मं जन्मे। छत्तीसगढ़ के सपूत हा देश मं हमर छत्तीसगढ़ के जस बगरावत हे। सुप्रसिद्ध संगीतकार अर्नब चटर्जी हा अपन प्रतिभा ले, संगीतकारी ले बंबई के स्टुडियो मं बड़े -बड़े कलाकार, गायक गायिका मन ला गवावत हे त उहें दूसर कोती छत्तीसगढ़ी गीत संगीत ला नवा ऊंचाई अउ पहचान देके भी कोशिश करत हे। अभी हाल ही में रीलीज होय गीत सावन मतावय जेन ला छत्तीसगढ़ के गीतकार चम्पेश्वर गोस्वामी हा लिखे हे। वो गीत हा भाषा, भाव अउ संगीत के मधुर जुड़ाव लगत हे। अर्नब जी हा शास्त्रीय संगीत अउ सुगम संगीत के क्षेत्र म विधिवत शिक्षा ग्रहण करे के बाद अपन किस्मत आजमाये बर बंबई चले गिन, तब ले आज तक उन बंबई मं रचगे अउ बसगे, फेर छत्तीसगढ़ी गीत संगीत डहर भी ऊंखर समर्पण हा दिखथे। बंबई आकाशवाणी द्वारा निर्मित स्वच्छ भारत अभियान अउ बेटी बचाओ बेटी पढ़ाओ में बतौर संगीतकार काम करीन। छत्तीसगढ़ के बड़े समारोह चक्रधर समारोह रायगढ़ में भी अपन कला के प्रस्तुति दीन हे। बंबई मं रहत अर्नब चटर्जी हा अनूप जलोटा, सुरेश वाडेकर, साधना सरगम, नितिन मुकेश, विनोद राठौर, बाबुल सुप्रीयो जइसन प्रसिद्ध अउ नवा कलाकार मन ला घलो अपन निर्देशन मं गवाये हे, अउ गवावत हे।कई मराठी सिरियल के टाइटल सांग मं भी संगीत देहे , संगीत के क्षेत्र मं उल्लेखनीय योगदान के सेती अर्नब चटर्जी ला कतकोन बड़का बड़का सम्मान मिले हे, अउ लगत हे कि ऊंखर काम के प्रति ऊर्जा अउ समर्पण हा अर्नब चटर्जी ला कतकोन सम्मान देवाही। अभी तो गीतकार चम्पेश्वर गोस्वामी लिखित अर्नब चटर्जी के संगीत ले सजे गीत हा, अर्नब चटर्जी अउ पामेला जैन सुमधुर आवाज में ASN cinemagic universe कंपनी ले रिलीज “सावन मतावय” हा ऑडियो के कई प्लेटफार्म मं एक संघरा धूम मचावत हे।